Éxito de participación na primeira actividade do Coliving Artístico Municipal impulsado polo Executivo de Paula Alvarellos

O obradoiro “Herbiñas en residencia”, dirixido pola artista e paisaxista Noa Rodríguez Méndez, marcou o comezo dunha serie de iniciativas destinadas a dar a coñecer esta innovadora instalación á cidadanía e á comunidade artística.

As persoas participantes percorreron e exploraron a botánica urbana da contorna do Carme. Durante tres horas, puideron coñecer de preto a vexetación que crece nas gretas da cidade e rexistrar novas formas de habitar o espazo urbano.

“O boa acollida desta primeira actividade demostra o potencial do Coliving como un catalizador de creatividade e desenvolvemento profesional no ámbito artístico e cultural”, destaca o concelleiro de Dinamización Económica, Mauricio Repetto. 

O Concello de Lugo celebrou onte con gran éxito de participación a primeira actividade do novo Coliving Artístico Municipal, impulsado polo Executivo de Paula Alvarellos, situado no barrio do Carme. O obradoiro de exploración botánica urbana titulado “Herbiñas en residencia”, dirixido pola artista e paisaxista Noa Rodríguez Méndez, marcou o comezo dunha serie de iniciativas destinadas a dar a coñecer esta innovadora instalación á cidadanía e á comunidade artística.

O concelleiro de Dinamización Económica, Mauricio Repetto, destacou a importancia deste primeiro paso: “É un orgullo ver como o Coliving Artístico Municipal comeza a súa andaina cunha actividade que captou tanto interese. A participación superou as nosas expectativas e confirma a necesidade de espazos como este en Lugo”.

As persoas participantes percorreron e exploraron a botánica urbana da contorna do Carme. Durante tres horas, puideron coñecer de preto a vexetación que crece nas gretas da cidade e rexistrar novas formas de habitar o espazo urbano. Repetto engadiu que “a boa acollida desta primeira actividade demostra o potencial do Coliving como un catalizador de creatividade e desenvolvemento profesional no ámbito artístico e cultural. Este espazo non só busca impulsar a innovación artística, senón tamén contribuír á rexeneración dunha zona estratéxica de Lugo”.

O Coliving do Carme, inaugurado en xuño, está deseñado para ser un centro de creatividade e desenvolvemento profesional. Ao longo do ano, planificáronse diversas actividades para fomentar o seu uso e dar a coñecer as súas instalacións. Ademais, en 2025, espérase que entre en funcionamento o Regulamento de Residencias Artísticas Internacionais, o que permitirá a artistas de todo o mundo optar a bolsas para desenvolver os seus proxectos neste espazo durante tres meses.

Entre as próximas actividades, inclúese un concerto acústico exterior a cargo da artista Nebra, inspirado na música tradicional lírica galega, e un taller interactivo no outono centrado na exploración da contorna e a creatividade, dirixido a nenos e familias.

A artista Noa Rodríguez, encargada da primeira actividade, foi recoñecida polo seu traballo tanto a nivel nacional como internacional. Licenciada en Belas Artes e cun Máster en Arte e Ciencia pola Central Saint Martins de Londres, a súa práctica artística inclúe proxectos de holografía e traballos de divulgación científica.

“O éxito desta primeira actividade no Coliving Artístico Municipal de Lugo demostra a demanda e o interese que suscitan este tipo de espazos na cidade, e pon de relevo o seu potencial como referente na promoción da arte e a cultura entre a sociedade lucense”, concluíu o edil Mauricio Repetto.