Mauricio Repetto participa na primeira sesión de co-deseño do CAM de Lugo xunto con axentes culturais de referencia a nivel nacional
Preto dunha vintena de persoas do ámbito artístico e cultural asistiron ao encontro, baixo o título Residencias artísticas: creación, lugares, vínculos.
O edil de Dinamización Económica, Mauricio Repetto, participou este martes no Coliving Artístico Municipal do Carme na sesión Residencias artísticas: creación, lugares, vínculos, a primeira das xornadas enmarcadas no programa Páxina en branco: sesións de codiseño para o CAM, nas que axentes culturais de referencia comparten as súas visións ao redor da programación de residencias artísticas.
A cita deste martes contou coa participación de Susana González (Comisaria e responsable do Centro de Arte FMJJ en A Coruña); Miriam Pérez (Directora de Espazo e Galería Vilaseco en A Coruña e Chantada); José Iglesias García (responsable da plataforma curatorial MAL, mediador en Concomitentes, Los Santos de Maimona, Estremadura); e o Colectivo Glovo (colectivo artístico, responsables das residencias artísticas e de investigación Atopémonos bailando, Lugo).
Estes axentes culturais, referentes no desenvolvemento de proxectos de residencias, compartiron as súas experiencias de deseño, xestión e comisariado de residencias e os seus impactos na profesionalización dos artistas, no territorio, as súas comunidades e a dinamización local. Preto dunha vintena de persoas participaron nesta sesión, ás que o concelleiro agradeceu “a súa colaboración e contribucións para poñer en marcha neste Coliving as Residencias Artísticas Internacionais de cara ao 2025, o que permitirá a artistas de todo o mundo optar a bolsas para desenvolver os seus proxectos neste espazo durante tres meses”.
A segunda sesión de co-deseño terá lugar o vindeiro 21 de novembro, baixo o título Boas prácticas culturais en residencias artísticas, e nela abordaranse as repercusións das boas prácticas nos proxectos de residencias artísticas. Así, exploraranse diversos enfoques sobre a profesionalización, a sustentabilidade, o acceso á cultura, ou protocolos para espazos seguros. Participarán Zaida Llamas e Alfredo Puente (Coordinación xeral e curadoría da Fundación Cerezales Antonino e Cinia, Cerezales do Condado, León); e Ania González (avogada especializada en dereito da cultura e propiedade intelectual, Vigo), entre outros profesionais por confirmar.
