O Executivo de Paula Alvarellos aspira a captar dous 2 millóns de euros dos fondos PERTE para dixitalizar e optimizar o ciclo da auga

O Goberno local planea un investimento total de 2.866.289 euros para executar nos próximos dous anos dentro do Proxecto Aqua Vita, centrado na modernización de rede de augas dos que 867.027 euros corresponden a fondos municipais.

“O obxectivo é mellorar a eficiencia dun recurso tan valioso establecendo un sistema de control integral que permitirá informar desde posibles fugas na rede ata realizar a telelectura dos contadores domiciliarios”, explicou a alcaldesa.

“A implantación destas medidas traduciríase nunha mellora do servizo prestado á cidadanía,  supoñería un aforro da auga subministrada do 11,53% para 2026 e permitiría introducir automatismos no sistema diario de traballo que melloraría a súa eficiencia”, dixo.

Conseguir esta liña de financiamento implicaría ademais introducir unha vertente social ao ciclo da auga detectando aspectos como as interrupcións de subministración en persoas maiores que viven soas, que serían notificadas aos Servizos Sociais Municipais.

Ademais o proxecto municipal posúe unha vertente ambiental que prevé a instalación de ferramentas de análises de riscos que permitan anticiparse en situacións de seca, actuar ante verteduras e alertar de riscos por inundación.

A alcaldesa de Lugo, Paula Alvarellos, informou esta mañá de que o Concello de Lugo concorrerá á terceira convocatoria dos fondos PERTE para a mellora da eficiencia do Ciclo Urbano da auga no marco do Plan de Recuperación, Transformación e Resiliencia. Deste xeito, o Goberno local opta a 2 millóns de euros destinados á dixitalización e sectorización das súas redes de abastecemento e saneamento. “O obxectivo é mellorar a eficiencia dun recurso tan valioso establecendo un sistema de control integral que permitirá informar desde posibles fugas na rede ata realizar a telelectura dos contadores domiciliarios con todas  as implicacións positivas que isto tería para as e os lucenses”, explicou a alcaldesa.

Así, o Goberno local expón un investimento total de 2.866.289 euros para executar nos próximos dous anos dentro do proxecto Aqua Vita, elaborado dende o servizo municipal de Medio Ambiente, centrado na modernización de rede de augas dos que 867.027 euros corresponden a fondos municipais. A proposta municipal, que foi aprobada hoxe en Xunta de Goberno Local, contempla medidas que, de contar con esta vía de financiamento, traduciríanse nun mellora do servizo prestado á cidadanía,  supoñería un aforro da auga subministrada do 11,53% para 2026 e permitiría introducir automatismos no sistema diario de traballo que melloraría a súa eficiencia.

Esta dixitalización e sectorización das redes de abastecemento e saneamento de auga permitiría reducir en máis dun 10 por cento as perdas de auga na rede ao realizar un control remoto de instalacións críticas como os Bombeos, sistemas de alivio ou a propia EDAR.  Ademais automatizaría parámetros de control como as verteduras industriais, a calidade da auga ou mesmo os cheiros provocados por anomalías na rede de saneamento. “Levar a cabo esta serie de melloras supoñería unha mellora inédita no referente á operativa, xestión e control de redes hidráulicas a nivel nacional”, sostivo Alvarellos Fondo.

“A medida que os comportamentos dos consumidores cambian e os efectos do cambio climático acentúanse, existe unha crecente necesidade de planificar a longo prazo, pero tamén de tomar decisións acertadas e orientadas a curto prazo.  O servizo de auga de Lugo debe ser cada vez máis resiliente, anticipándose aos impactos e desenvolvendo plans de adaptación. Para construír un futuro sostible é necesario non só ter a infraestrutura adecuada, senón tamén controlar de antemán o que vai suceder e o seu porqué”, explicou a alcaldesa.

Nesta liña, dentro desta  iniciativa municipal deseñouse un sistema de comunicación entre os sensores habilitados na rede que achegarían información do seu estado e unha central de datos que a través dunha aplicación planificadora permitirá priorizar as tarefas que automaticamente serían ordenadas por importancia de avisos e ordenes de traballo pendentes, segundo necesidades ou urxencias nas incidencias comunicadas. “Este aspecto, exemplifica a mellora na eficiencia do servizo que aspiramos a implementar e que nos permitiría optimizar, entre outros aspectos, a xestión da mobilidade dos activos que posuímos como o persoal ou a frota de vehículos co seu consecuente aforro enerxético e económico”, apuntou a rexedora.

A obtención destes fondos PERTE implicaría ademais introducir unha vertente social ao ciclo da auga en Lugo detectando aspectos como as interrupcións de subministración en persoas maiores que viven soas, que poderían ser notificadas aos Servizos Sociais Municipais de forma automática. Ademais deste novo enfoque social o Proxecto Aqua Vita posúe unha vertente ambiental que prevé a instalación de ferramentas de análises de riscos que permitan anticiparse en situacións de seca, actuar ante verteduras e alertar de riscos por inundación achegando ao municipio unha maior resilencia fronte ás continxencias producidas pola actual situación de cambio climático.

“Contar con todas estas capacidades é especialmente importantes neste momento, xa que a subministración de auga a nivel continental está baixo unha gran presión pola sobreexplotación das captacións, a crecente demanda de recursos, o crecemento da poboación, e, sobre todo, polos efectos do cambio climático. Por iso o proxecto Aqua Vita contempla tamén que Lugo avance como municipio no uso da auga rexenerada que poderá ser destinada a rega urbana ou a outras finalidades en función das necesidades puntuais. En definitiva trátase dun proxecto moi traballado que consideramos concorre coas maiores garantías de éxito posibles”, concluíu Alvarellos.